انواع الشباب ع ـالماسنجر

مرحبااااااااا يا حلوين


أنواع الشباب عالمسنجر ...

لما اتخلصوووو من الموضوع قولوا انتوا اي نوع

*ـــــــــ*
العاقل :

لما يفتح مسنجره مايكلم حد ينتظر الكل يرحب فيه وهو يبتسم ويقول شكرا


واذا احد ارسل له فايل او رابط اغنيه حط علامة استفهام وسكت نص ساعه مايكلمه ولما يكون


متحمس بالكلام يكتب كلمه في سطر ويضغط انتر ويخاف من الاخطاء الاملائيه وضحكته عباره عن


ابتسامه واذا كان فرحان وايد ثلاث ابتسامات


المصلحجي :


مايسلم عليك الا مره بالشهر يدخل عليك فجأه ويحط لك ورده مع انه كل يوم متواجد وساكت


ويستخدم مشغول او بالخارج واذا احتاج مساعده يجيك ويسلم عليك


ويقول وينك من زمان ماشفتك وليش ماتسأل عني ؟


ترى اخوي كل يوم يفتح مسنجري واوصيه كل يوم يبلغك سلامي


لاني وايد مشغوول مع الدراسه <<الله من النصب والترقيع


وبعد مايخلص مصلحته يقولك عن اذنك بروح اكمل مذاكره


الرسمي :


يرتب المجموعات الى قسم العائله وقسم اللزملاء فقط وطبعا مافيه قسم اصدقاء واغلب كلامه مثل


احترم نفسك رجاء هذي امور خاصه فيني ولما تسأله شخبارك يرد بخير ويسكت واذا سلمت عليه يرد


وعليكم ويسكت اغلب وقته يقرا مواضيع بالمنتديات
في قسم الرأي الاخير ويعشق برنامج الاتجاه المعاكس


الــخـبـل :


هذا كل سوالفه ضحك وكل شوي يكتب نكته ويضحك لحاله وضحكته طويله تقريبا 3 سطور ونص


واغلب كلامه بالصور يستخدم كل صور المسنجر وغلطاته الاملائيه كثيره ويجمع عدة اشخاص في


محادثه وحده ويتكلم عن ثلاثه مواضيع في وقت واحد ويقرا العنوانين الرئيسيه بالجريده ويجي يسأل


عنها <<يقاله متابع الاحداث وكل شوي يغير الصورة الجانبيه ولون الخط



الدفش :


يغيب ايام طويله مدري وين يروح ويرجع فجأه وكلامه مثل شخبارك شخبار امك عساها طيبه ؟


يالغبي اقلب .. اقلب وجهك .. خلك ريال .. لاتزعل وانا اخوك تراني امزح ( م.ح ) ودايم يطيح الميانه وثقافته



ماتتعدى المتوسطه وتفكيره البر والويلات والريس يموت بخالد عبدالرحمن مايعرف من العطورات


غير دهن العود ابو عشرين ولو كلمته عن ماركة قوتشي او ديور يقول مقاطع الامريكان وضحكته


جذا هع هع .. ويكتب بلون اسود لانه مايعرف يغير الألوان



الفيـل ( هذا نادر ) :


طباخ ممتاز ويحب يسولف عن الاكل ودايم جوعان ونقطة ضعفه جال**ي جواهر والاندومي وقبل


موعد العشا بساعه يكون مزاجه متعكر ودايخ ويسولف من غير نفس ودايم يوعان ولما ينادونه للعشا


يقفل المسنجر بسرعة البرق ودايم يتكلم عن تجاربه الفاشله بالرجيم ومستحيل تشوفه في النهار


اوقاته من العصر وطالع ودمه خفيف ومرهف المشاعر



البرئ :


عمره يكبر وعقله مايتغير مازال طفل وعلى نياته يثق في كل الناس بسرعه يتأثر وكل يوم يسألك كم


عمرك يعشق سبيس تون وبينك بانثر يحب سوالف البلاي ستيشن يتواجد العصر والمغرب لانه ينام


بدري ماعدا يوم الخميس طبعا هااع .. شعاره الدنيا حلوة احيانا اييبلك سكته قلبيه من غباءه ومع ذلك


الاول عالمدرسه لو بلغته باسرارك بيفضحك بكل منتدى يخاف من القطو واي شي يمشي على اربع


ريول حتى انت لو تمشي على اربع بيخاف منك خخخخخخخ



الشين :



اسمه الحقيقي سداح والا مفتاح .. يعايرونه اخوانه بو يبهه


ايي بالمسنجر يتخقق يقول اسمي عزوز والا عبود ودايم مايعجبه العجب واذا شافك مشغوله انواع


الضريايب والشتايم واذا ماعطيتيه ويه انواع الصفط والركب وتحتار كيف ترضيه تعطيه اغنيه يقولك ماحب الاغاني


يشبه العنز الغضبان كل شي يضايقه يكره اليسا ونانسي( الله ياخذك ) ويموت بالطقاقات مايعرف يجامل ولا يمدح الا نفسه


دايم يوصف نفسه بالجمال يدخل الشات يكتب اسمه الرومنسي والا المزيون



المتزوج :


هذا ممكن يكون سبب في كرهــك للزواج كل سوالفه عن مشاكله الزوجيه وغثى عياله ومرته وفجاه يقول برب


يروح يضارب ولده ويرجع وكل يوم يسألك متى ناوي تتزوج عشان نفرح فيك << خير انشالله


واذا يت مرته جنبه يقفل المسنجر شعاره : يازين حياة العزوبيه


نكه : المهموم - الجريح - المهاجر .. يحب يسمع الكلام العاطفي واغاني عبدالحليم ومزاجه وايد ثجيل


يضحك ومره يصيح ومره يبيعها وينام

يسلمو العميد ياحوت الموضوع جميل

يسلمو انا عاقلة هههه تحياتى